- 19 Հու
- 2024
Հայտարարվում է «Գիտական ստորաբաժանումների ամրապնդման ծրագիր - 2024» մրցույթ
ԲԿԳԿ է «Գիտական ստորաբաժանումների ամրապնդման ծրագիր - 2024» մրցույթը:
Բարձրագույն կրթության և գիտության կոմիտեն կազմակերպում է «Գիտական ստորաբաժանումների ամրապնդման ծրագիր - 2024» մրցույթը, որն ուղղված է Հայաստանի Հանրապետության պետական բյուջեի գիտական և գիտատեխնիկական գործունեության բազային ֆինանսավորմամբ ծրագիր իրականացնող կազմակերպությունում հեռանկարային, ժամանակակից գիտական ուղղություններով առկա գիտական ստորաբաժանումների ամրապնդմանը և զարգացմանը:
Մրցույթը նպատակ ունի խթանելու ներպետական և միջազգային համագործակցությունը, զարգացնելու գիտական կազմակերպության գիտական և գիտատեխնիկական ներուժը, ներգրավելու սփյուռքի և արտերկրի գիտական ներուժը, ներգրավելու երիտասարդ հետազոտողների և ասպիրանտների, նպաստելու միջազգային հետազոտական միջավայրին երիտասարդ հետազոտողների ինտեգրմանը, բարելավելու գիտական միջավայրը, ամրապնդելու նոր, մրցունակ և հեռանկարային գիտական ստորաբաժանումները, խթանելու գիտության ոլորտում մրցակցային պայմանները:
Հայտում ներառված գիտական նախագիծը կարող է լինել գիտության բոլոր բնագավառների մասնագիտություններով, նախագծի իրականացման տևողությունը 60 ամիս է:
Նախագիծը մշակում և իրականացնում է 4-7 անդամից բաղկացած գիտահետազոտական խումբը, որը կազմված է ղեկավարից և կատարողներից:
Խմբի անդամները Հայտ ներկայացնելու փուլում կարող են լինել ինչպես Հայաստանի Հանրապետության, այնպես էլ օտարերկրյա քաղաքացիներ:
Խմբի անդամները Նախագծի իրականացման ընթացքում պետք է հանդիսանան Հայաստանի Հանրապետության քաղաքացիներ կամ ռեզիդենտներ, ինչպես նաև Նախագծի իրականացման ընթացքում բնակվեն Հայաստանի Հանրապետությունում:
Հայտը ներկայացնում է Խմբի ղեկավարը
Խմբի ղեկավար կարող է լինել այն անձը, ով՝
- ծնվել է 1974 թվականի հունվարի 1-ից հետո,
- ունի գիտական աստիճան,
- Կազմակերպությունում 2024 թվականի հուլիսի 26-ի (Հայտերի ընդունման վերջնաժամկետի) դրությամբ առնվազն վեց ամիս զբաղեցնում է Ստորաբաժանման ղեկավարի պաշտոն:
Խմբի անդամներից առնվազն երկուսը պետք է ծնված լինեն 1989 թվականի հունվարի 1-ից հետո և կարող են լինել բակալավրիատի առնվազն երրորդ կուրսի ուսանողներ:
Խումբը պետք է ունենա օտարերկրյա գործընկեր (Foreign Partner, Collaborator):
Մրցույթին մասնակցելու հայտն անհրաժեշտ է ներկայացնել Կոմիտեի մրցույթների հայտերի և հաշվետվությունների ընդունման համակարգով՝ https://grants.hesc.am:
Ուշադրություն. Առցանց համակարգով հայտերի մուտքագրումը հասանելի կլինի 2024թ. հուլիսի 5-ից:
Առցանց դիմելու վերջնաժամկետը 2024թ․ հուլիսի 26-ն է: Ֆինանսավորման մեկնարկը նախատեսվում է 2024թ․ նոյեմբերից։
Մրցույթի վերաբերյալ լրացուցիչ տեղեկություններ և խորհրդատվություն կարելի է ստանալ Բարձրագույն կրթության և գիտության կոմիտեից՝ զանգահարելով 010-210-140 (*113) կամ տեխնիկական հարցերով՝ 010-210-140 (*108):
